విద్యాదాన వాక్సరస్వతీ హృదయస్తోత్రం
ఓం అస్య శ్రీ వాగ్వాదినీ శారదామంత్రస్య మార్కండేయాశ్వలాయనౌ ఋషీ,
స్రగ్ధరా అనుష్టుభౌ ఛందసీ,
శ్రీసరస్వతీ దేవతా . శ్రీసరస్వతీప్రసాదసిద్ధ్యర్థే వినియోగః ..
ధ్యానం ..
శుక్లాం బ్రహ్మవిచారసారపరమాం ఆద్యాం జగద్వ్యాపినీం
వీణాపుస్తకధారిణీమభయదాం జాడ్యాంధకారాపహాం .
హస్తే స్ఫాటికమాలికాం విదధతీం పద్మాసనే సంస్థితాం
వందే తాం పరమేష్వరీం భగవతీం బుద్ధిప్రదాం శారదాం .. 1..
బ్రహ్మోవాచ .
హ్రీం హ్రీం హృద్యైకవిద్యే శశిరుచికమలాకల్పవిస్పష్టశోభే
భవ్యే భవ్యానుకూలే కుమతివనదహే విశ్వవంద్యాంఘ్రిపద్మే .
పద్మే పద్మోపవిష్టే ప్రణతజనమనోమోదసంపాదయిత్రి
ప్రోత్ప్లుష్టా జ్ఞానకూటే హరినిజదయితే దేవి సంసారసారే .. 2..
ఐం ఐం ఐం ఇష్టమంత్రే కమలభవముఖాంభోజరూపే స్వరూపే
రూపారూపప్రకాశే సకలగుణమయే నిర్గుణే నిర్వికారే .
న స్థూలే నైవ సూక్ష్మేఽప్యవిదితవిషయే నాపి విజ్ఞానతత్త్వే
విశ్వే విశ్వాంతరాళే సురవరనమితే నిష్కళే నిత్యశుద్ధే .. 3..
హ్రీం హ్రీం హ్రీం జాపతుష్టే హిమరుచిముకుటే వల్లకీవ్యగ్రహస్తే
మాతర్మాతర్నమస్తే దహ దహ జడతాం దేహి బుద్ధిం ప్రశస్తాం .
విద్యే వేదాంతగీతే శ్రుతిపరిపఠితే మోక్షదే ముక్తిమార్గే
మార్గాతీతప్రభావే భవ మమ వరదా శారదే శుభ్రహారే .. 4..
ధ్రీం ధ్రీం ధ్రీం ధారణాఖ్యే ధృతిమతినుతిభిః నామభిః కీర్తనీయే
నిత్యే నిత్యే నిమిత్తే మునిగణనమితే నూతనే వై పురాణే .
పుణ్యే పుణ్యప్రభావే హరిహరనమితే వర్ణశుద్ధే సువర్ణే
మంత్రే మంత్రార్థతత్త్వే మతిమతిమతిదే మాధవప్రీతినాదే .. 5..
హ్రీం క్షీం ధీం హ్రీం స్వరూపే దహ దహ రుదితం పుస్తకవ్యగ్రహస్తే
సంతుష్టాచారచిత్తే స్మితముఖి సుభగే జంభనిస్తంభవిద్యే .
మోహే ముగ్ద్ధప్రబోధే మమ కురు సుమతిం ధ్వాంతవిధ్వంసనిత్యే
గీర్వాగ్ గౌర్భారతీ త్వం కవివరరసనాసిద్ధిదా సిద్ధిసాద్ధ్యా .. 6..
సౌం సౌం సౌం శక్తిబీజే కమలభవముఖాంభోజభూతస్వరూపే
రూపారూపప్రకాశే సకలగుణమయే నిర్గుణే నిర్వికారే .
న స్థూలే నైవ సూక్ష్మేఽప్యవిదితవిభవే జాప్యవిజ్ఞానతత్త్వే
విశ్వే విశ్వాంతరాళే సురగణనమితే నిష్కళే నిత్యశుద్ధే .. 7..
స్తౌమి త్వాం త్వాం చ వందే భజ మమ రసనాం మా కదాచిత్ త్యజేథా
మా మే బుద్ధిర్విరుద్ధా భవతు న చ మనో దేవి మే జాతు పాపం .
మా మే దుఃఖం కదాచిద్విపది చ సమయేఽప్యస్తు మేఽనాకులత్వం
శాస్త్రే వాదే కవిత్వే ప్రసరతు మమ ధిః మాఽస్తు కుంఠా కదాచిత్ .. 8..
ఇత్యేతైః శ్లోకముఖ్యైః ప్రతిదినముషసి స్తౌతి యో భక్తినమ్రః
దేవీం వాచస్పతేరప్యతిమతివిభవో వాక్పటుర్నష్టపంకః .
సః స్యాదిష్టార్థలాభః సుతమివ సతతం పాతి తం సా చ దేవి
సౌభాగ్యం తస్య లోకే ప్రభవతి కవితావిఘ్నమస్తం ప్రయాతి .. 9..
బ్రహ్మచారీ వ్రతీ మౌనీ త్రయోదశ్యాం నిరామిషః .
సారస్వతో నరః పాఠాత్ స స్యాదిష్టార్థలాభవాన్ .. 10..
పక్షద్వయేఽపి యో భక్త్యా త్రయోదశ్యేకవింశతిం .
అవిచ్ఛేదం పఠేద్ధీమాన్ ధ్యాత్వా దేవీం సరస్వతీం .. 11..
శుక్లాంబరధరాం దేవీం శుక్లాభరణభూషితాం .
వాంఛితం ఫలమాప్నోతి స లోకే నాత్ర సంశయః .. 12..
ఇతి బ్రహ్మా స్వయం ప్రాహ సరస్వత్యాః స్తవం శుభం .
ప్రయత్నేన పఠేన్నిత్యం సోఽమృతత్వం ప్రయచ్ఛతి .. 13..
ఇతి శ్రీబ్రహ్మాండపురాణే నారదనందికేశ్వరసంవాదే బ్రహ్మప్రోక్తే
విద్యాదానవాక్సరస్వతీహృదయస్తోత్రం సంపూర్ణం ..
ఏవం రుద్రయామలే తంత్రే దశవిద్యారహస్యే సరస్వతీస్తోత్రం .
👉విద్యకు ఆటంకాలు తొలగి పోతాయి.
